الوو ...ماكرون...بونجور ...

جو سوي ديزوليه ...نحن ما بدنا رئيس قوي آدمي مستقل صاحب موقف بيحترم الدستور وبيختار بنفسه  وزراء مختصين مستقلين ...

نحن بدنا رئيس يغطي فسادنا كل يوم بيوم ...نحن جماعة بيمشي بعروقنا  الفساد ..عم تسمعني...

نحن بدنا رئيس نملي عليه ما نريد و دوره ان ينفذ ...ديكور يعني  ما يحطلنا سقف عالي ...عم تفهمني ...

نحن بدنا رئيس بيشبه السلطة اليوم ضمير نائم واحساس ميت ما بينوجع على شعب عم  يموت من  الجوع والعوز والمرض و يهاجر بقوارب الموت هربا من الجوع بحثا عن حياة افضل واشرف من الحياة في لبنان ...عم تركز معي...

نحن بدنا رئيس ما بيعنيلو تحقيقات انفجار المرفأ ومين دخل امونيوم ومين سهل؟ ومين نفذ ؟ومين قبض ؟ومين فجَّر ؟ومين مسؤول عن موت ٢٠٠ ضحية وجرح ٦٠٠٠ شخص وتشريد العديد من المواطنين وتكبيد خسائر واضرار مادية جسيمة...؟؟؟

نحن بدنا رئيس ما بيقدر ينزل دولار لمعدله الطبيعي  لان الاصلاحات المطلوبة بتنزلنا من عروشنا ...وكل ما نحن مبسوطين بالفساد الدولار طالع طلعته ورح يلامس ال ٤٠ الف واي رئيس ..ما بيقدر يمنع الغلاء الفاحش وفوضى اسعار التجار وفلتان الاسواق ...عم تسمعني؟ الو الو

ماكرون نحن بدنا رئيس يوقِّع على قبوله بمرحلة السوق السوداء والصندوق الاسود والعهد الاسود ...

هلق حطلي على جنب الصراع الاميركي الايراني والانتخابات الاميركية  وتمنيات السعودية والبعد الاقليمي كله سوا يلي بيرسم مسيرتنا ما اختلفنا  ..بس نحن هيدي شروطنا .ونقطة على السطر ...وغير هيك ما في ...والمبادرة الفرنسية على راسنا .  

الوو ماكرون الو ..طولت عليك ...ديزوليه ..  الله يوفيك عنا ...وبدك ما تواخذنا ...هيدا نحن وهيدا جونا ...

امانة سلام خاص للجنرال غورو بقبره وخبره انو عم نخلص وبح لبنان ...والله يطول بعمرك ويصبرك  ...ويصبر شعب لبنان المذلول .. 

او روفوار...

#ريما_خداج_حمادة

٢٧ /ايلول /٢٠٢٠